काव्यमय समस्यापूर्ती - ३

समस्यापूर्तीसाठीची ओळ -
"तसा न राहिला आता उदास एकटेपणा"...

त्यावर मी लिहिलेली कविता -

आठवणी ठेवून मागे, सहचर गेला दूर प्रवासा
गर्दीतही एकटेपणाने जीव झाला वेडापिसा

"साथ सुटते कधी अचानक, भकास वाटते रिते जीवन
कुरवाळून ठेवली व्यथा जर, ग्रासून टाकी एकटेपण..
आयुष्याचे वास्तव हे खरे, 'मी' येतो एकटा जातो एकटा
गुंतून पडता सहप्रवाशांत, वेदनेचा रुततो काटा"...

जाणिव होता या सत्याची, शांत झाले क्लांत हे मन
दिसू लागले नजरेला या गरजू अन किती एकटे जन
आठवणींनीच दिली हिंमत, झटकण्या दुबळेपणा
दूर करण्या इतरांची एकाकी, कामी आला एकटेपणा
मन होते हळवे अजूनही, पण त्यात आता न उरला रडेपणा
अजूनही गर्दीत जीव एकटाच, पण तसा न राहिला आता 'उदास' एकटेपणा...